தமிழ் புதுவருட தாளி / Tamil New Year Thali | Thali Recipe

அனைவருக்கும் இனிய தமிழ் புத்தாண்டு வாழ்த்துக்கள்!!

தமிழ் புத்தாண்டு அன்று இனிப்பு, கசப்பு,புளிப்பு,காரம்,துவர்ப்பு,உப்பு என அனைத்து சுவைகளையும் செய்து படைப்பார்கள்.வாழ்வில் மனிதன் அனைத்து வகை சுவைகளையும் பெற்று சமநிலையாக வாழ் வேண்டும் என்பதே இதன் அர்த்தம்.

தலைவாழை இலையில் இடது பக்கம் ஓரத்தில் உப்பு முதலாக வைத்த பின்பே அனைத்து பதார்த்தங்களையும் பரிமாறுவார்கள்.

இதில் நான் பரிமாறியிருப்பது இடமிருந்து வலமாக

பொங்கல் - இனிப்பு

உருளை வறுவல் -காரம்

பார்பிள் கோஸ் பொரியல்

வாழைப்பூ பொரியல் -துவர்ப்பு

மாங்காய் பச்சடி - இதில் அனைத்து வகை சுவையும் இருக்கு.வேப்பம்பூ சேர்த்தும் செய்வார்கள்

வேப்பம்பூ ரசம் - கசப்பு

அப்பளம்

சாதம்+முருங்கைக்காய் வெண்டைக்காய் மாங்காய் சாம்பார்

மெதுவடை

ஜவ்வரிசி பாயாசம்.

இதில் உருளை வறுவல்+கோஸ் பொரியலில் பட்டாணி சேர்க்காமலும்,வாழைப்பு பொரியலில் முருங்கைக்கீரை சேர்க்காமலும் மற்றும் முருங்கைக்காய் வெண்டைக்காய் மாங்காய் சாம்பாரில் கத்திரிக்காய் பதில் வெண்டைக்காய் சேர்த்து செய்துள்ளேன்.இந்த காம்பினேஷன் சாம்பார் வித்தியாச சுவையில் இருக்கும்.

இனி பாயாசம் செய்முறையை பார்க்கலாம்..

ஜவ்வரிசி பாயாசம்

தே.பொருட்கள்

ஜவ்வரிசி - 1/4 கப்
சுண்டக்காய்ச்சிய பால் -1/2  கப்
கண்டண்ஸ்ட் மில்க் -4 டேபிள்ஸ்பூன்
சர்க்கரை - 1/4 கப்
ஏலக்காய்த்தூள் -1/4 டீஸ்பூன்
உப்பு -1 சிட்டிகை
நெய்யில் வறுத்த முந்திரி,திராட்சை - தேவைக்கு

செய்முறை

*ஜவ்வரிசியை வெறும் கடாயில் நன்கு பொரியும் வரை வறுக்கவும்.இப்படி செய்வதால் சீக்கிரம் வேகும்.

*பாத்திரத்தில்  3/4 நீர் வைத்து கொதிக்கவிடவும்.கொதித்ததும் வருத்த ஜவ்வரிசி சேர்த்து வேகவிடவும்.

*வெந்ததும் பால்+சர்க்கரை+கண்டண்ஸ்ட் மில்க் சேர்க்கவும்.

*சர்க்கரை கரைந்ததும் ஏலக்காய்த்தூள்+வருத்த முந்திரி திராட்சை சேர்த்து  இறக்கவும்.

பி.கு

ஜவ்வரிசி பாயாசம் ஆரியதும் கெட்டியாகிவிடும்.அப்போழுது குளிர்ந்த நீர் சேர்த்து கலக்கி பரிமாறவும்.